من دواويني

رباعيات منصـــــور


( 1 )

قـالــوا الحيــاة غـابــة , أنـا قلــت وأنا مــالــي
قــالـوا الأســـد جــارك , فـهربــت بـعيــالــي
لـفــِّيـت بـــلاد الله لاقـيــت أســود كـتيــــر
ونمــور , فهـــود , ذئــاب , عقــارب , سحـالي

************************

( 2 )

زهــــرة وكــانــت فــي الـجُـنـيـنــة نَــدِيــة
وعـشــان مـا أقــرب لهـا , قـطـفـتـهــا بحِـنيـــة
ومشيــت وقلبــي سعيــد , حتــى بــاب البيــــت
ولمــا جيــت أحضنهــا , مــاتــت علـى إيـديـــا

************************

( 3 )

الـعُــمــر ســجَّــان , وسـجـــــن صـغـيـــر
وبـيـبـانـــه مـقـفـولة بـقفـل صــغــيـــــر
مـفـتـاحــه مـخـتـوم بـخـتـم الـمــــــــوت
ولـمـا يـفـتــح لـي , م الـسـجــــن هـتـحــرر

************************

( 4 )

جــاوب هتكســب , بـس إعــرف إيــه الســؤال
صعبــة الإجــابـة , لكنــها مـش شــيء محـــال
وعـشــان مـا تـوصــل للإجــابـــة الصــــــح ,
تِـلقـى فــ طريقـك مِـيــت مليـــون ســــــؤال

************************

( 5 )

كابـوس سابنـي , كابـوس جالـي , كابـوس هايم
و فــ كـل ليلــة يـيـجـي لــي كابـوس وأنا نـايــم
وأقـول أهـون , وأخـاف من نومـي لـو أصحـى
لأن الواقــع الحالـي ــ بأحزانــه ــ كابـوس دايـم

************************

( 6 )

أنـا رُحــت يــوم بلد , فيها الفـقـيـــر سَـيـِّـد
عنــده فلــــوس كتيـر , والقصــــر متـشَـيِّد
سألت إيـه السبـب , جـالـي الجـواب على طول
سـبـــب سمـو البلــد , الحـــق متـسـَـيّـد

************************

( 7 )

ماشـي في وســط الضلمـة , والضلمـة عريانــة
تبغـي غطــا من نـــور , لأحســن دي عيَّـــانــة
أنا اللي ولعـــت شمعــــة لأجـل مـا أغطيهـــا
وإيــــه تعمـــل الدوبـــارة لواحـــدة بردانـة ؟

************************

( 8 )

عايــز تعيــش مرتـاح ؟ تضمـن لنا سكوتـــك ..
ويتخـرس صـوتــك , فـلابـد مـن مـوتــــك
عايـز تعيــش مجـروح ؟ أصرخ وقول الحـق ..
تلقــى طريـــق النــار , وبرضــه فيــه موتـــك

************************

( 9 )

كـــلام , و صـــراخ , و زعيــــق , وعـويـــل
و نعيـــــد و نـزيـد علـى قََـــال وقِـيـــــــل
و حـــروف محطــوطــة فــ وســــط كـــــلام
و لا نطـلـع مــــــرة بـمعنـــى جـمـيــــــل

************************

( 10 )

رواد فضـــاء اتعلمـــــوا معنـــــى النظـــــام
رواد الأرض اتعلمـــوا بــــس الكــــــــــلام
بيــن فــوق وتحـت فـروق كتيــر , ولمــا نطلـع
كلنــــا , هنقـــــول علـى الأرض الســـــلام

************************

( 11 )

زرعــت الخيـــــر ورويــته بمــيِّة شـــــــر
وسهـرت جنبــه عشان أحميــه في عـز الحــر ,
و عـز البــرد , وجـاه اليـــوم عشـان أحصـــــد
لاقيــت خيــري اللي أنا زارعــه , بطعـم المـــر

************************

( 12 )

حمــار وشـايـل وحـده , صاحبــه مع الأحمــال
ماشي في سكـة طويلـة , و لا يشتكي عن حـال
راضـي عن المقسـوم , لو حتى كان فتافيـــــــت
بس اللي شايل صاحبه , ما ييجي له راحة البال

************************

( 13 )

حبِّينا الحياة و حلاوتها , كرهتنا الحياة بوحاشِتها
وكرهنا الحياة ووحاشتها , حبِّتنا الحياة بحلاوتها
مجنونة الحيـاة مجنونة , واللي يحبِّــها مجنــون
مجنونة الحيـاة مجنونة , واللي بيكـره شقاوتهــا

************************

( 14 )

أنــا قلبــــــي سنيـن وشهور مـــش بايــــــن
بيخــاف م النـــــور , مهمـــوم , مــش خايــــن
مغـــروس فــي تــــراب , يطـــرح أحاسيـــــس
أتــاريـــه البذرة فــ وســــــط جنايــــــن

************************

( 15 )

يجينـا الفـرح , نضحـك لـه ونفتـح لـه دراعاتنــا
نخبِّـي عليــه تُلـول لوعتنــا وهمومنــا وأهاتنــا
ويمشـي الفـــرح , نعـود مـن تانـي للأحــــزان
يلازمنـا كأنـه خيـال , ويتركنـا في يــوم موتنــا

************************

( 16 )

زرعـت النجـم في عيونـي وبدموعـي أنا برويـــــه
ولما يغمضـوا جفونـي أفتش عنه ولا بلاقيــــــــــه
ولما أصحى من نومي ألاقي النور ألاقي الشمــس
وبستنى يجيني الليل , وأنوح وأبكي وأزرع فيــــه

************************

( 17 )

أمام النـاس كريـم حسـَّاس ومن جواه خسيـس واطـــي
يحب القِـرش ولو شـاف قِـرش بيسجـد له وبيطاطــــي
في يوم ماشي لقى كتكوت وكان تايـه , يصرخ يقــــول
" مين ضاع منُّه .. " وقال " كتكوت " بصوت واطي

************************

( 18 )

أنــا الخيــر اللـي معجـون شــر , أنـا الإنســـــــان
أنــا النـُـص اللـي فيـَّا مـــلاك , ونـُـص شيطــــان
حــاولت كتيــر أقـلـــــد ده , أو أصـبــــح ده
فـشـلـت , رجعــت لطبيعتــي , بقيــت إنســــان

************************

( 19 )

لما شـربـــت الأمــــل , الكــاس وراه الكــــاس
سكـرت , توهـت , عِليـت , لفـوق وفـوق النــاس
و لمــا فُـقـت لاقـيـــت , رِجـلـيــَّا مـش ع الأرض
يـأســت قـُمـت هـويـت , واليـأس صـار نبـــراس

************************

( 20 )

أنــا المقتـــــول , ومـاعــرفشـي اللي قـاتلنـــي
وأنــا المـدفـون , ولا شفــــت اللــي دافنِّــــــي
ولـــو ح عـــرف راح أعـمــــل إيــــه ؟
مـا أنــا مقتـــول ولـو شـالــوا التراب عنِّــــــي
..........................................................

بسم أمـريكا العظيم
دكتور بجامعة حلوان كتب على السبورة ( بسم أمريكا العظيم ) وقال للطلاب ديانتي هي الديانة الأمريكية الجديدة
فكانت هذه القصيدة

قبْلِ ما ْ .. نبدأ كلامنا
فــِ الـدِّيانة وسين وجيم ..
كلِّنا ْ..لازم نسمِّي ..
بسم ِ أمريكا العظيم
كلِّنا ْ .. لا ّزم نقدِّم للإلّهة ــ
تحتِ رجليها القوية ..
واحنا بنبوس ِ الأيادي ــ
قربان ولاء
كلِّنا ْ .. لازم نطاطي وْ .. نتقي شرّ الإلهة
كلِّنا ْ .. نسجد لها
( غيَّرْ قِبْلِتك للغرب ..
واحمد واشكر
سبِّـح .. سبِّـح )
بسم ِ أمريكا العظيم
درسنـا اليوم عن مبادئ ..
الديانة الأمريكيـة
الديانة الأمريكيـة هيَّ إنِّ الربة تطلب ..
واحنا كلِّ ما علينـا بدون تـردد نبتسم ..
ونقول لها " أمر ِك مُطاع "
مانتـوا عارفين " أمريكية " ..
كلمة مشتقة أساساً من لغتنا ..
هيَّ " أمر ِك "
الديانة الأمريكيـة هيَّ إنِّ الربة تقتل ..
واحنا ندفن
هيَّ إنِّ الربة تبنـي نار نيرانها فــِ العراق
هيَّ إنِّ الربة جنة للي يسجد
انتهى الدرس ِ يا سادة ..
ممكن آخد كام سؤال
أيوة قول
ــ هوَّ ليه أمريكا ربِّ مشْ إيـران ؟
ــ مش إيران أو غير إيران ..
هيَّ أمريكا لْـوَحِدْها تمتلك مليون صفة ..
تعلو بيها عن إيران أو غير إيران
هيَّ أمريكا القوية ..
هيَّ أمريكا القديرة ..
هيَّ أمريكا العليمة والخبيرة والكبيرة ..
هيَّ أمريكا اللي شاءت أنْ يكون ..
لازم يكون
ــ ميـن رسولها ؟
ــ مش رسول لأ دُول رسل ..
بس ِّ أعظمهم يُسمَّى إسرائيل ..
مبعوث لنا ..
لازم نطيعه كلنا ..
أصل ِ فـْـ إيديه المعجزات ..
خلَّى الأسود زي الحمير ..
ماسمعش منهم غير نهيـق ..
فلتحيـا أمريـكا العظيمة و إسرائيل ..
فلتحيـا أمريـكا العظيمة و إسرائيل .
..........................................................

سبب غيابي

خدنا إيه م الدنيا دي غير دمعتين ..
وصغيرين ..
وبيكبروا وبيطرحوا ..
حبة كآبة صغيرين ..
وبيكتروا
الحزن قام ..
دايس وواقف ع الكلام ..
وبيقتله
والناس ملام ..
ما بيعذروا
الحزن خلَّى الكلمة طالعة مشوهة ..
وإن قلتها ...
مافهمشي حاجة منها
والناس تقول لي إنها ..
ملهاش مقـــام
يمكن لأن الحزن عندي جذر فارع في التراب ..
دايما يمص فـ كل تربة حزن شكل ..
يطرح كلام ما يأثـروا ..
ما يخضَّـروا ..
إحساس وشعر .
..........................................................

نفسي أعرف

نفسي أعرف من عيونك 000 انتي شاردة مني ليه
مش باغشك أو بخونك 000 وآدي شوقي حسي بيه
انتي شمسي وانتي قمري 000 انتي نوري وانتي عمري
ليه بلاقي قلبي تايه 000 بين عيونك ليه بتأسي
وتعذبيه
*************
عمري ما القى حضن تاني 000 أقدر أرمي فيه دموعي
أو عيون تبقى عشاني 000 مرسى تستنى رجوعي
انتي حضني اللي لاقيته 000 فرحة لو يومي بكيته
وانتي عيني اللي رماني 000 بحرها ما بين ربوعي
****************
شوفي قلبي لو لاقاكي 000 هتلاقيه طاير سعيد
باني عشه من هواكي 000 يبقى يومه أحلى عيد
هتلاقيه بالحب غنى 000 هتلاقيه عايش في جنة
جنة يرسمها معاكي 000 فوق جبين حلمه الجديد
..........................................................

ضيفنـا ونخلتـه


مش أبويا ..
اللي كان للشر زارع ..
نخلة تطرح .. مش أبويا
مش أنا ..
اللي كان للنخلة طالع ..
منها يقطـف .. مش أنا
الحكاية ..
الحكاية إنها في أرضنا
والبداية ..
لما جالنا ضيف هنا
والنهاية ..
النهاية مانتهتش
ضيفنا قاعـد ..
قال : " ده حقي ونخلتي ..
وللحماية ..
ياريـت كمان الفدانين "
بعتنـا للعمـدة استغـاثة ..
والغلاسة ..
إنه رد بكلمتين :
" هي حقه ونخلته "
قلنا : " ماشي ..
طب حكاية الفدانين ؟ "
برضه رد بكلمتين :
" إنت تـورث الجنوب
وانت تورث الشمال
وانت تورث اليمين "
وانفصلنـا واختلفنـا
واللي طامع قال في حتـة ..
واللي بايع بالفلوس
كنا عُـصبة .. كنا واحد ..
لما كان أبونا فينا
ولما مات ..
اختلفنا واختفينا ..
ولسه ضيفنا ونخلته تطرح علينا
والنهاية ..
النهاية مانتهتش
..........................................................

ورقة من كتاب ألف ليلة

أعلنت سِتي الأميرة ..
في شتى أنحاء البلد
عن مسابقة تكون كبيرة ..
فيها الولد جنب الولد
قلنا نسمع إيــه هيجـرى
وجه البيـان :
" يا رجال المملكة ..
سِتي الأميرة الطيبة
فتحت مكان للهشتكة ..
والرقص والطرب الأصيل
والمدعوين ...
همّا مغرور الوزير ..
والثقيل صاحب الأميرة ..
والأميرة صاحبة المِلك العظيم
ونـاس كتيـر ...
منهم .. بنعرف نخوته ..
منهم .. بنعرف قسوته ..
منهم بنعرف رغوته زي الصابون ..
لما بنمدح عطسته ..
يتنفـخ زي البـالون
ومفيش مكان لابن الغفير
المهم ..
سِتـي الأميرة الطيبـة ..
عاملة مسابقة كويسة
اللي يجيـب م الأغنيـات مـا لم يجاب ..
له الشرف إن أول شخص جاب
والسلام هو الختام "
أنا قلت أسارع واشترك ..
يمكن يكون ليّا الشرف
و رحت دعبست ف شرايطي
لاقيت أغاني متلتلة
وقلت أشوف مين الولد إبن الولد ..
اللي هيسبـق خطوتي
وجريت معـايا هديتي
لاقيت سابقني ـــ شوف يا سيـدي ــ
عم مغرور الوزير ..
والثقيل صاحب الأميرة , والأميرة الطيبة
وحمـدت ربِّـي ..
لما لاقيت هديتـي مش زي حـد ..
ولما قدمـت الهديـة ...
والأميرة توجتنـي
قـال ثقيل صاحب الأميـرة الطيبة :
" يا أميرة ..
نفسي يكون ليّا الشرف "
وبدون تردد أو هزار ..
شفت حراس الأميرة الطيبة ..
مـاسكين في كوعي وبدلتي ,
وصوت يدل إنه أميـرة طيبة ..
قالت بطيبة كلمة واحدة طيبة :
" إعدموه ..
هاتوا شرايطه واعدموه "

وقبل ما تموت نظرتي ..
شفت تاجي لابسه الثقيل ..
صـاحب الأميرة الطيبة .
..........................................................

مقطتفات من واقع الحياة


فـرن العيـش
في فرن العيش وانا واقف
طابورنا طويل
في فرن العيش وانا بحلم ..
بِحِلم جميل
في فرن العيش ..
أنا شايف رغيف العيش ومش طايله
لأن الناس قدامي و ...
طابورنا طويل
وبنسى عذابي لو طوِّل
ولما وصلت في الأول ..
ومستني ييجي لي العيش ..
لاقيته مفيش


تــاكســي

أنا قلت تاكس ..
ولا حد عبَّر
وقلت يأس ..
وقلت أُصبر
وبعد ساعة ..
لاقيت بتاعة ..
بتقول لي
بيب
أنا قلت تاكس
و راح واقف لي
وقلت
طلخا
و راح قايــل لــي ..
" كان غيرك أشطر"
وقلت يأس ..
وقلت أُصبر
وبعد ساعة ..
لاقيتني راحل ..
و واخدها مشي .

طلخا": مدينة بجانب المنصورة يكره السواقين الذهاب إليها


مصلحة حكومية
كانوا اتنين واقفين عايزين ..
نفس الشيء
واحد طلَّع خمسة جنيـه
قال له البيـه :
" إمشي يا نجم "
واحد قال له :
" ياللا يا بيه"
قال البيـه:
" ناقص ختـم"
..........................................................

مقطتفات من واقع الحياة


فـرن العيـش
في فرن العيش وانا واقف
طابورنا طويل
في فرن العيش وانا بحلم ..
بِحِلم جميل
في فرن العيش ..
أنا شايف رغيف العيش ومش طايله
لأن الناس قدامي و ...
طابورنا طويل
وبنسى عذابي لو طوِّل
ولما وصلت في الأول ..
ومستني ييجي لي العيش ..
لاقيته مفيش


تــاكســي

أنا قلت تاكس ..
ولا حد عبَّر
وقلت يأس ..
وقلت أُصبر
وبعد ساعة ..
لاقيت بتاعة ..
بتقول لي
بيب
أنا قلت تاكس
و راح واقف لي
وقلت
طلخا
و راح قايــل لــي ..
" كان غيرك أشطر"
وقلت يأس ..
وقلت أُصبر
وبعد ساعة ..
لاقيتني راحل ..
و واخدها مشي .

طلخا": مدينة بجانب المنصورة يكره السواقين الذهاب إليها


مصلحة حكومية
كانوا اتنين واقفين عايزين ..
نفس الشيء
واحد طلَّع خمسة جنيـه
قال له البيـه :
" إمشي يا نجم "
واحد قال له :
" ياللا يا بيه"
قال البيـه:
" ناقص ختـم"
..........................................................

محاولة فاشلة

لما شفت الموت بياخد ..
كل واحد روحي فيه
قلت أضحي ..
قلت أكره كل واحد ..
إلا نفسي
واعذروني ..
الحكاية صعبة خالص ..
إني اكره كل واحد روحي فيه
واللي أصعب ..
حب نفسي
..........................................................

مسكت القلم

" حلمت إني شاعر وعالم كبير ..
بشجُب وأندِّد وأصحِّي الضمير ..
وأحارب وأعاتب وأعارض وأثور ..
وكلمة كاتبها في حالة تجلِّي ..
بتشنق وتقتل حياة ديكتاتور "
ولما صحيت ..
بعيني رأيت ..
أماني سعيدة وورقة وقلم
ونادى القلم ..
فقمت وجريت
مسكته ورسمت حروف كلمتين
وقبل أما أكمل كلام غنوتي ..
سمعت الجرس ..
فتحت لاقيتهم ..
حكومة وحرس
خدوني ورموني ..
ما بين سين وجيم
وبسمع شتايم ..
وصوت الكفوف ..
تصقَّف تشوف ..
تعاين قفايا
وأشوف اللي يبكي وبصعب عليه
سألت المحقق وإيه تهمتي ؟
وجالي الجواب :
" عليك تهمتين ..
وأول قضية بتشمل جرايم ..
وأول قضية إنك بتحلم
في يوم خمسة منُّه ..
حِلمت ببنت جميلة وبهية ..
جريمتك زنا
في يوم ستة منه ..
حلمت بوقوعك ..
ويعني انتحار
وحلمك بجنِّي ..
في يوم سبعة منه ..
قضية دجل
ووليلة إمبارح ..
حلمت بفلوس ..
لأنك حرامي
وحتى النهاردة ..
حلمك كشاعر وعالم كبير ..
يندد ويشجب يصحي الضمير ..
جريمة إنقلاب ..
وده وحده يكفي عشان يعدموك
وتاني قضية ..
مسكت القلم " .
..........................................................

لاشكر على واجب